LOFTSLAGSMÁL

Eldsneytisnotkun er veigamesti umhverfisþátturinn í annars orkufrekri starfsemi Isavia. Vel er fylgst með eldsneytisnotkun í starfseminni og unnið að því að draga úr þar sem hægt er. Stærsti hluti notkunarinnar er vegna þjónustu og viðhaldi á brautum og athafnasvæðum flugvallanna. Þó umfang hennar tengist að einhverju leyti farþegafjölda, þá er hún að mestu háð veðri og því geta orðið sveiflur, einkum þegar sinna þarf vetrarþjónustu í marga daga á ári.

Veturinn 2018-2019 taldi 157 daga af vetrarþjónustu á Keflavíkurflugvelli. Það er frá fyrsta degi að síðasta degi vetrarþjónustu. Við snjóhreinsun voru unnar 5240 vélastundir, eða 33 vélastundir að meðaltali á sólarhring.

Isavia vinnur eftir aðgerðaáætlun í umhverfis- og loftslagsmálum. Þar eru settar fram ýmsar aðgerðir sem eiga að draga úr neikvæðum umhverfisáhrifum af starfsemi Isavia. Aðgerðirnar snúa meðal annars að endurnýjun bílaflota, skynsamlegri nýtingu auðlinda, aukinni rafvæðingu og kolefnisjöfnun.

Í lok árs 2019 var samþykkt uppfærð aðgerðaáætlun sem gildir til næstu tveggja ára.

Bein orkunotkun

Verulega dró úr eldsneytisnotkun Isavia frá því á síðasta ári þegar horft er til heildareldsneytisnotkunar eða um 25% á milli ára. Eldsneytisnotkun á hvern farþega jókst aftur á móti um 18% á milli ára  vegna fækkunar farþega.  Markmið Isavia fyrir árið 2019 var að draga úr notkun eldsneytis á hvern farþega um 4% og var því markmiði ekki náð.

Bein orkunotkun GRI 302-1 og minnkun á orkunotkun GRI 302-4

Losun gróðurhúsalofttegunda (GHL)

Bein losun Gróðurhúsalofttegunda í gegnum orkunotkun      UMfang  1

Beina losun gróðurhúsalofttegunda Isavia má rekja til eldsneytisnotkunar. Árið 2019 var bein losun gróðurhúsalofttegunda Isavia vegna brennslu á jarðefnaeldsneyti 2310 t CO2e . Það er töluvert minna en síðustu ár á undan.

Isavia gerði á vordögum 2019 samninga við Kolvið og Votlendissjóð um kolefnisjöfnun á eldsneytisnotkun Isavia til þriggja ára, afturvirkt um eitt ár. Það þýðir að árin 2018, 2019 og 2020 mun Isavia kolefnisjafna alla beina losun í starfseminni.

Óbein losun gróðurhúsalofttegunda (GHL) í gegnum orkunotkun  Umfang 2

Á árinu gerði Isavia raforkusamning við HS veitur. Sá samningur felur í sér að öll raforka sem Isavia kaupir skuli vera frá endurnýjanlegum auðlindum og laus við álögur vegna sölu uppruna ábyrgða. Sú orka sem Isavia notar í starfsemi sinni í formi rafmagns eða hita, kemur frá fjarvarmaveitum eða vatnsaflsvirkjunum. Í báðum tilfellum er um að ræða endurnýjanlega orkugjafa sem valda lítilli losun gróðurhúsalofttegunda. Óbein losun vegna hita og rafmagns er því lítil sé horft til framleiðslu rafmagns með öðrum leiðum. Samkvæmt Umhverfisstofnun er meðal losun raforkuframleiðslu 8,8 gr kolefnisígilda á hverja kílóvattstund. Óbein losun Isavia í gegnum raforkunotkun árið 2019 voru 206 t CO2.

Önnur óbein losun gróðurhúsalofttegunda í gegnum orkunotkun Umfang 3

Til losunar í umfangi 3, óbeinnar losunar í starfseminni, má meðal annars telja meðhöndlun sorps og ferðir starfsmanna. Síðustu ár hefur Isavia notað Loftslagsmæli Festu til þess að áætla kolefnislosun vegna umfangs 3. Árið 2019 er fyrsta heila árið sem Isavia nýtir umhverfisvöktunarkerfi Klappa. Með því hefur komist betri mynd á kolefnislosun. Isavia hefur fram að þessu notað losunarstuðla fyrir urðun sorps fyrir allt sorp sem fer ekki til endurvinnslu. Hluti almenns sorps frá Keflavíkurflugvelli fer þó ekki í urðun, heldur í brennslu í brennslustöðinni Kölku í Reykjanesbæ. Með því að nýta kerfi Klappa hefur Isavia fengið nákvæmari upplýsingar um losunarstuðul fyrir sorp sem fer til brennslu og það skýrir mun lægra kolefnisfótspor frá meðhöndlun sorps en áður hefur verið gefið upp. Í ljósi þessa hefur heildarlosun ársins 2018 verið endurreiknað. Losun kolefnisígilda við urðun og brennslu á sorpi Isavia árið 2019 voru 59 tonn.

Minnkun á losun GHL GRI 305-5

Bein losun gróðurhúsalofttegunda á hvern farþega jókst lítillega á milli áranna 2018 og 2019. Ef horft er til lengri tíma, eða frá 2015, þá hefur losun á hvern farþega dregist saman. Skarpur samdráttur í farþegafjölda í tengslum við brotthvarf WOW air, setur þennan mælikvarða úr skorðum. Áfram dregur úr heildarlosun og losun frá stórum þáttum líkt og eldsneytisnotkun heldur áfram að dragast saman. Lækkun varð á beinni losun GHL vegna eldsneytisnotkunar, á milli áranna 2018 og 2019 um 14%.

Borealis Alliance Free Route Airpspace

Isavia er aðili að Borealis Alliance sem eru samtök níu flugleiðsöguveitenda (ANSP) í Norður-Evrópu. Þar er unnið að Free Route Airspace verkefni sem á að leiða af sér styttri flugtíma sem leiðir af sér minni eldsneytisnotkun sem þýðir lægri kostnað og minni mengun. Á Íslandi geta flugrekendur nú áætlað og flogið beina flugleggi milli Keflavíkurflugvallar og til flugvalla í Noregi og Skotlandi, sem eru næstu flugstjórnarsvæðin í suðaustri við það íslenska.

Áhrif flughæðar á eldsneytisnotkun flugvélar eru talsverð. Eftir því sem líður á flugferð er hagstæðara fyrir flugvélar að fljúga í hærri flughæðum. Áætlað er að þúsund feta (1000 fet) frávik frá kjörflughæð kalli á 1% auka eldsneytisbrennslu á klst.

Framlag flugleiðsöguþjónustunnar til þess að flugvélar fái kjörflughæð (optimum) hverju sinni er því mikilvægt. Byrjað er að fylgjast með frammistöðu flugleiðsöguþjónustunnar hvað varðar afgreiðslu flughæðarbeiðna og gögn frá 2018 og 2019 leiða í ljós að flugvélar fái umbeðnar hæðir (kjörflughæð) í 80-90% tilvika þó breytilegt eftir svæðum (sektorum).