UMHVERFISMÁL

Vatn

Isavia er meðvitað um mikilvægi þess að varðveita ferskleika og hreinleika grunnvatns í nærumhverfinu. Á Keflavíkurflugvelli hefur verkfræðiráðgjafarfyrirtækið Verkís haft yfirumsjón með grunnvatnsrannsóknum. Sýni voru tekin árið 2017, 2018 og nú síðast í mars og nóvember 2019. Bandaríkjaher var áður með aðstöðu á svæðinu og er almennt vitað að mengun fylgdi starfsemi hans þar. Vísbendingar um efnanotkun á flugvallasvæðinu finnast í grunnvatnssýnum úr öllum borholum. Þessar vísbendingar benda til mismikillar mengunar, en þó ekki í miklu magni. Niðurstöður rannsókna sýna flökt á efnainnihaldi en í grunninn virðist mengun fara minnkandi, þó erfitt sé að slá því föstu, til þess þarf að framkvæma áframhaldandi mælingar. Isavia mun því halda áfram mælingum og vöktun á gæðum grunnvatns.

Isavia sækir vatn sitt í veitur hvers staðar fyrir sig og hefur ekki endurnýtt eða endurunnið vatn af flugvallasvæðum. Isavia hefur einnig bætt fráveitulagnir undanfarin ár á alþjóðaflugvöllum sem jafnan tengjast fráveitukerfum viðkomandi sveitarfélaga. Árið 2016 var unnið að endurbótum á fráveitulögn frá vesturhluta Keflavíkurflugvallar sem fer í sjó fram. Reist var tveggja þrepa dælu– og hreinsistöð við Djúpavík sunnan Stafness í Sandgerðisbæ og ný og lengri útrás lögð í sjó fram. Að öðru leyti nýtir Isavia sér fráveitukerfi þeirra sveitarfélaga sem hver starfsstöð er í og er viðtakinn í öllum tilfellum sjór, en mismunandi er hversu mikil hreinsun er á fráveituvatninu. Olíuskiljur og settjarnir taka við bróðurparti þeirra mengandi efna sem að öðrum kosti myndu enda í fráveitunni.

Lífríki

Flugvallasvæði Isavia eru eins fjölbreytt hvað varðar lífríki eins og þau eru mörg. Reykjanesskaginn er Unesco jarðvangur og hefur mikla sérstöðu hvað varðar jarðminjar, sumar sem eru einstakar á heimsvísu. Líklega þekktasta dæmið þar um er hversu vel má sjá flekaskil Evrasíu – og Norður-Ameríkuflekana. Þó engar jarðminjar sé að finna á flugvallasvæði Keflavíkurflugvallar, er hann vissulega staðsettur á mjög jarðfræðilega merkilegu landsvæði.

Í áraraðir hefur Isavia fylgst mjög vel með dýralífi innan flugvallasvæða og greint nánasta umhverfi flugvalla m.t.t. ásóknar dýra og fugla. Ásókn villtra dýra er mjög mismunandi eftir flugvöllum enda svæðin mismunandi hvað varðar gróðurfar og fæðuframboð. Mikilvægur hluti af rekstri flugvalla er að stunda aðgerðir sem leiða til minni hættu fyrir flugfarþega og minnka líkurnar á árekstri dýrs og flugvélar. Það er gert með því að beita fjölbreyttum aðferðum við fælingar, t.d. með búsvæðastjórnun.

Starfsmenn Isavia sem sinna dýralífsmálum skrá fjölda og tegundir þeirra dýra sem sjást á flugvöllunum. Mikil vinna fer í að fylgjast með og kortleggja atferli dýra, sérstaklega fugla í og við flugvelli og býr starfsfólk, sem þessu sinnir, yfir mikilli þekkingu í dýralífsstjórnun. Á síðasta ári vann Náttúrustofa Reykjanes og Þekkingarsetur Suðurnesja úttekt á fuglalífi á Keflavíkurflugvelli. Í kjölfarið voru haldnir fræðslufundir fyrir starfsmenn Flugvallarþjónustunnar. Isavia skráir einnig alla mögulega árekstra fugla og annarra villtra dýra við flugvélar á öllum sínum flugvöllum.

Skráðir voru 11 staðfestir árekstrar fugla við flugvélar á Keflavíkurflugvelli á síðasta ári.  Á innanlandsflugvöllunum voru skráðir 12 árekstrar fugla við flugvélar.