LOFTSLAGSMÁL

Bein orkunotkun

Eldsneytisnotkun er veigamesti umhverfisþátturinn í annars frekar orkufrekri starfsemi Isavia. Vel er fylgst með eldsneytisnotkun í starfseminni og unnið að því að draga úr þar sem hægt er. Á síðasta ári hófst prófun á íblöndun repjuolíu á tæki á Keflavíkurflugvelli og standa vonir til að hægt verði að auka íblöndun á næstu misserum.

Langstærsti hluti eldsneytisnotkunar er vegna þjónustu og viðhalds á brautum og athafnasvæðum flugvallanna. Þó umfang hennar tengist að einhverju leyti farþegafjölda, þá er hún að mestu háð veðri og því geta orðið sveiflur, einkum þegar sinna þarf vetrarþjónustu í marga daga á ári. Veturinn 2019-2020 var vetrarþjónusta veitt á Keflavíkurflugvelli í 141 dag. Við snjóhreinsun voru unnar 5460 vélastundir

Isavia hefur unnið eftir aðgerðaáætlun í umhverfis- og loftslagsmálum sem gildir út árið 2021. Þar eru settar fram ýmsar aðgerðir sem eiga að draga úr neikvæðum umhverfisáhrifum af starfsemi Isavia. Aðgerðirnar snúa meðal annars að endurnýjun bíla- og tækjaflota, skynsamlegri nýtingu auðlinda, aukinni rafvæðingu og kolefnisjöfnun. Nú þegar er hafin vinna við endurskoðun þessarar aðgerðaáætlunar og mótun nýrrar sjálfbærnistefnu.

Eldsneytisnotkun Isavia dróst lítillega saman frá því á síðasta ári, þegar horft er til heildareldsneytisnotkunar en þegar skoðuð er notkun á hvern farþega jókst hún töluvert milli ára. Skýringin liggur í mikilli fækkun farþega á Keflavíkurflugvelli vegna Covid-19 faraldursins. Þá kom bersýnilega í ljós að eldsneytisnotkun Isavia tengist farþegafjölda lítið, eins og sagt var frá hér að ofan. Markmið Isavia fyrir árið 2020 var að draga úr notkun eldsneytis á hvern farþega um 4% og var því markmiði því ekki náð.

Bein orkunotkun GRI 302-1 og minnkun á orkunotkun GRI 302-4

Óbein losun gróðurhúsalofttegunda (GHL) í gegnum orkunotkun  Umfang 2

Árið 2019 gerði Isavia raforkusamning við HS veitur. Sá samningur felur í sér að öll raforka sem Isavia kaupir skuli vera frá endurnýjanlegum auðlindum og laus við álögur vegna sölu upprunaábyrgða. Sú orka sem Isavia notar í starfsemi sinni í formi rafmagns eða hita, kemur frá fjarvarmaveitum eða vatnsaflsvirkjunum. Í báðum tilfellum er um að ræða endurnýjanlega orkugjafa sem valda lítilli losun gróðurhúsalofttegunda. Óbein losun vegna hita og rafmagns er því lítil sé horft til framleiðslu rafmagns með öðrum leiðum. Óbein losun Isavia í gegnum raforkunotkun árið 2020 voru 215 t CO2.

Önnur óbein losun gróðurhúsalofttegunda í gegnum orkunotkun Umfang 3

Til losunar í umfangi 3, óbeinnar losunar í starfseminni, má meðal annars telja meðhöndlun sorps og ferðir starfsfólks. Síðustu ár hefur Isavia notað Loftslagsmæli Festu til þess að áætla kolefnislosun vegna umfangs 3, en árið 2019 var fyrsta heila árið sem Isavia nýtti umhverfisvöktunarkerfi Klappa. Með því komst betri mynd á kolefnislosun félagsins. Hluti almenns sorps frá Keflavíkurflugvelli fer ekki í urðun, heldur í brennslu í brennslustöðinni Kölku í Reykjanesbæ. Losunarstuðlar fyrir brennslu á sorpi eru lægri en vegna urðunar. Losun kolefnisígilda við urðun og brennslu á sorpi Isavia árið 2020 voru 86 tonn.

Bein losun gróðurhúsalofttegunda á hvern farþega jókst verulega á milli áranna 2019 og 2020. Heimsfaraldur hefur þar mikil áhrif, en eins og áður var nefnt er ljóst að losun á hvern farþega er ekki heppilegur mælikvarði. Skoða þarf nánar hvaða mælikvarði er heppilegri, en endanlegt markmið Isavia er að draga úr heildarlosun, óháð farþegafjölda eða fjölda flughreyfinga. Áfram er verið að leggja áherslu á að draga úr heildarlosun og losun frá stórum þáttum eins og eldsneytisnotkun. Minnkun varð á beinni losun GHL vegna eldsneytisnotkunar, á milli áranna 2019 og 2020 um 12,7%.

Minnkun á losun GHL GRI 305-5

Borealis Alliance Free Route Airpspace

Isavia ANS er aðili að Borealis Alliance sem eru samtök níu flugleiðsöguveitenda (ANSP) í Norður-Evrópu. Þar er unnið að Free Route Airspace verkefni sem á að leiða af sér styttri flugtíma sem leiðir af sér minni eldsneytisnotkun sem þýðir lægri kostnað og minni mengun. Á Íslandi geta flugrekendur nú áætlað og flogið beina flugleggi milli Keflavíkurflugvallar og til flugvalla í Noregi og Skotlandi, sem eru næstu flugstjórnarsvæðin í suðaustri við það íslenska.

Áhrif flughæðar á eldsneytisnotkun flugvélar eru talsverð. Eftir því sem líður á flugferð er hagstæðara fyrir flugvélar að fljúga í hærri flughæðum. Áætlað er að þúsund feta (1000 fet) frávik frá kjörflughæð kalli á 1% auka eldsneytisbrennslu á klst.